SIBU: SMK Chung Hua mujur bulih gelar champion ba dua bengkah kategori Pekit Nyemerai Entara Sekula Sekondari enggau Primari MSS Sibu 2011.
Pekit ke diatur SMK Tiong Hin begulai enggau Gerempung Nyemerai Amatur Sibu (SASA) tu dipejadika ba Pegung Nyemerai Bukit Lima ditu.
Pekit tiga hari berunggu tu berengkah ari 19 Julai nyentukka pagi kemari, digulu 17 buah sekula nyengkaum lapan buah sekula sekondari enggau semilan buah sekula primari sitak Sibu.
SMK Chung Hua ke bulih penuduk lumur satu (anugerah keseluruhan) bagi kategori lelaki mai pulai perais Trupi (pusingan) SASA Lelaki ti ngalahka SMK Sacred Heart (136 puin) ba penuduk lumur dua enggau puin 261.
SMK Rosli Dhoby semina bepuas ati ba penuduk lumur tiga bulih 108 puin.
Bagi kategori indu, sekali agi SMK Chung Hua temegah ati enggau pemutus 197 puin ti mandangka sida pulai mai Trupi (pusingan) SASA Indu.
SMK Methodist ke bulih 135 puin mujur ba penuduk lumur dua lalu ditangkan SMK Katolik enggau 101 puin.
Bagi sekula primari, SJK Chung Sing mega nitihka pemujur SMK Chung Hua ke bulih penuduk champian ba dua bengkah kategori.
Pemutus champian mandangka SJK Chung Sing mai perais Trupi (pusingan) Datuk Patinggi Tan Sri Dr Wong Soon Kai.
Sekula tu ngalahka SJK Tung Hua (271 puin) ba penuduk lumur enggau 309 puin.
Penuduk lumur tiga pulai ngagai SJK Su Lai enggau 90 puin.
Champian bagi kategori indu mega pulai ngagai SJK Chung Sing lalu mandangka sida mai perais Trupi (pusingan) Dato’ Sri Yong Sau Kan.
Sekula tu mujur bulih 316 puin ngalahka SJK Tung Hua (258 puin) lalu ditangkan SJK Taman Rajang (77 puin) ba penuduk lumur tiga.
Perais sida ke menang disuaka Kaban Parlimen Lanang ti mega Chairman Opis Kunsil Sibu, Datuk Tiong Thai King.
